వరుణ్ తేజ్ 'కొరియన్ కనకరాజు'... 'కమ్సహమ్నిదా' మేకింగ్ వీడియో ఇదిగో!

మెగా ప్రిన్స్ వరుణ్ తేజ్ కథానాయకుడిగా నటిస్తున్న చిత్రం 'కొరియన్ కనకరాజు'. మేర్లపాక గాంధీ దర్శకత్వంలో రూపొందుతున్న ఈ హారర్ కామెడీ సినిమా నుంచి చిత్రబృందం తాజాగా ఓ అప్‌డేట్ ఇచ్చింది. ఇప్పటికే విడుదలై చార్ట్‌బస్టర్‌గా నిలిచిన 'కమ్సహమ్నిదా' పాట మేకింగ్ (బిహైండ్ ది సీన్స్) వీడియోను శుక్రవారం విడుదల చేసింది. ఈ వీడియో ప్రస్తుతం అభిమానులను ఎంతగానో ఆకట్టుకుంటోంది.

తమన్ స్వరపరిచిన ఈ పాటకు కాసర్ల శ్యామ్ సాహిత్యం అందించగా, సిద్ శ్రీరామ్ తన గాత్రంతో ప్రాణం పోశారు. కొరియన్ భాషలో 'కమ్సహమ్నిదా' అంటే 'ధన్యవాదాలు' అని అర్థం. ఈ పదంతోనే కథానాయిక రితికా నాయక్ సరదాగా పాటను ప్రారంభిస్తుంది. ఈ పాటలో వరుణ్ తేజ్ మాస్, రగ్డ్ లుక్‌లో కనిపించగా, రితికాతో ఆయన జోడీ చాలా ఫ్రెష్‌గా ఉంది. యష్ మాస్టర్ కొరియోగ్రఫీ పాటకు మరింత అందాన్ని తెచ్చింది. విడుదలైన మేకింగ్ వీడియోలో పాట చిత్రీకరణ వెనుక ఉన్న సందడిని, వరుణ్-రితిక మధ్య కెమిస్ట్రీని చూపించారు.

ఫస్ట్ ఫ్రేమ్ ఎంటర్‌టైన్‌మెంట్స్, యూవీ క్రియేషన్స్ సంయుక్తంగా నిర్మిస్తున్న ఈ సినిమా చిత్రీకరణ దాదాపు చివరి దశకు చేరుకుంది. ఇటీవలే కొరియాలో వరుణ్ తేజ్, రితికా నాయక్, సత్యలపై కీలక సన్నివేశాలు, పాటలను చిత్రీకరించారు. 

హారర్ కామెడీ జానర్‌లో, ఇండియా-కొరియా నేపథ్యంలో ఈ సినిమాను భారీ బడ్జెట్‌తో నిర్మిస్తున్నారు. త్వరలోనే సినిమా విడుదల తేదీని అధికారికంగా ప్రకటించే అవకాశం ఉంది. ఇదివరకే విడుదలైన టైటిల్ గ్లింప్స్ సినిమాపై అంచనాలను భారీగా పెంచిన విషయం తెలిసిందే.